د مصالحې عالي شوار د غړو په اړه د ولسمشر فرمان جنجالي شوی دی. د دې شورا د ځینو غړو لخوا د غړیتوب له نه منلو وروسته، اوس ډاکټر عبدالله هم دا شورا نه مني او وايي چې دا د ولسمشر نه، بلکې د مصالحې د عالي شورا صلاحیت دی چې دا شورا جوړه کړي. د مصالحې عالي شورا مشر ډاکټر عبدالله په یوه خپره کړې خبرپاڼه کې ویلي، چې د دې شورا په اړه د ولسشمر فرمان ته اړتیا نشته. په اعلامیه کې د عبدالله او اشرف غني تر منځ د سیاسي هوکړه لیک پر «ب» بند استناد شوی چې پکې ویل شوي: «د ملي مصالحې عالي شورا له ولسمشر، سیاسي طرفونو او رهبرانو، د ملي شورا د دواړو مجلسونو له رییسانو، مدني ټولنې او د هېواد له نخبه ګانو سره په مشوره، تشکیلېږي».
د ارګ لخوا د سولې په برخه کې هره هڅه د دې پر ځای چې له سولې سره مرسته وکړي، نوې لانجې زیږوي او د سولې له اصلي بحث څخه خلک منحرفوي او پر فرعي او بې ارزښته مسایلو یې بوختوي. د مصالحې عالي شورا په اړه د ولسمشر فرمان هم همداسې یو ګام و. دې فرمان څو اساسي ستونزې لرلې. لومړۍ ستونزه دا وه چې له ډېرو غړو سره یې مشورې نه وې شوې او پرته د هغوی له اجازې په شورا کې راوستل شوي وو. دویمه ستونزه دا وه چې د حامد کرزي او ګلبدین حکمتیار په شان کسان یې د عبدالله مامورین او تر لاس لاندې کسان کړي وو. درېیمه ستونزه پکې دا وه چې په شورا کې ځینې ډېر مهم کسان هېر شوي وو او ځینې ډېر نامهم پکې اخیستل شوي وو. څلورمه ستونزه دا وه چې شورا ټولشموله نه وه او د ډېرو سیمو، ولایتونو او آن قومونو استازي پکې یا هېڅ نه وو او یا هم کم وو. تر دې ګردو مهمه او لویه ستونزه پکې دا وه چې یوه لویه برخه کسان، سیاسي ګوندونه او اړخونه ټول حکومتي شوي وو چې دا نه د دغو اړخونو غوښتنه وه او نه هم دې چارې له سولې سره مرسته کولی شوی.
پر دغو ټولو ستونزو سربېره، ولسمشر بیا هم له خپل شریک او د مصالحې شورا له مشر ډاکټر عبدالله سره له مشورې او د هغه له توافق پرته دا کار وکړ. پایله یې پراخ اختلاف دی. اوس به ولسمشر له اوږدو لانجو وروسته خپل فرمان بېرته اخلي او ستونزه به په یو ډول دوام کوي. ولسمشر له ډاکټر عبدالله سره په ناقانونه ډول واک وویشه، خو چې کله یې دا کار وکړ او هوکړه لیک یې ورسره لاسلیک کړ، نو بیا پکار ده چې دغه هوکړه لیک ته ژمن پاتې شي. له بده مرغه هم لاسلیک کوي او هم بیا پرې عمل نه کوي. له همدې امله نیم حکومت فلج دی او له همدې امله د مصالحې عالي شورا غړي نه وو او چې اعلان شول، نو جنجالي شول.
اصلي خبره دا ده چې ارګ پر هر څه ملنډې وهي، سوله نه غواړي او غواړي هر څه جنجالي کړي. له همدې امله پر جرګه ملنډې ووهل شوې، ټول حکومت سرپرست دی، نیم حکومت فلج دی، د مصالحې عالي شورا جنجالي شوې، د سولې خبرې ورکې دي او جګړه زیاتیږي. تر هغو چې په ارګ کې دا کړۍ واکمنه وي او تر هغو چې دوی له هر څه سره داسې لوبې کوي، نو زموږ حالت به ورځ تر بلې خراب شي، نه به مو حکومتولي سمه شي او نه به هم د سولې خوند ووینو. له همدې امله یا باید د ارګ د واکمنو فکر او کار بدل شي او یا هم ځای او مقام.
