د سولې د بین الافغاني خبرو پر وړاندې ټول لوی خنډونه لرې شوې او تمه ده چې دا خبرې په راتلونکو څو ورځو کې په دوحه کې پیل شي. د افغان دولت تخنیکي ټیم په دوحه کې دی او د طالبانو د مذاکراتي ټیم پاتې غړي هم دوحې ته رسېدلي دي. د خبرو د پيل په مراسمو کې به د ډاکټر عبدالله په ګډون ځیني سیاستوال، د امریکا ځانګړی استازی زلمي خلیلزاد او ځیني نور بهرني دیپلوماتان هم برخه واخلي.
که څه هم اوس هیله ډېره ده، خو تر هغو چې د سولې خبرې پیل شوې نه وي، لا هم د دې شونتیا شته چې و دې ځنډیږي او ښکېل اړخونه دې د تمې خلاف دریځ ونیسي. له همدې امله لا هم سل سلنه یقیني نه ده چې خبرې حتمي په څو ورځو کې پیلیږي، خو دا ځل د پخوا خلاف مهم او اساسي پرمختګ شوی او هېڅ لویه ستونزه نه ښکاري چې خبرې دې وځنډوي. دواړه اړخونه هم د خبرو پیل ته د تیارۍ خبرې کوي او د خبرو پیل ته هیله من دي.
خبرې به پیلیږي، خو دا مهمه ده چې دا لومړنۍ خبرې به څه ډول وي، ځکه چې څرنګوالی یې مخامخ پر راتلونکو خبرو او د سولې د پروسې پر برخلیک اغېز پرې باسي. دواړه لوري په دې نیت خبرو ته داخلیږي، چې پر بل اړخ خپل نظر او غوښتنې ومني او یا په بله وینا، مقابل لوری مات کړي. دا ذهنیت ستونزه لري، بلکې پکار ده چې دواړه اړخونه په دې نیت خبرو ته ننوځي چې د افغانستان ستونزه حل کړي او سولې ته ورسیږي. دا سمه ده چې د لورو غوښتنې یو مخ هېرېدلی نه شي، خو پکار ده چې اصلي تمرکز پر سوله وي او غوښتنې د همدې سولې پر محور را وڅرخیږي. دویمه او مهمه خبره دا ده چې پیل باید له سختو او اختلافي مسایلو و نه شي. طبعي ده چې سخت او اختلافي مسایل شته او هغه باید حل شي، خو که پیل له سختو مسایلو وشي، نو ستونزې به زیاتې شي. له همدې امله پکار ده چې پیل له اسانه او هغو مسایلو وشي چې دواړه لوري پرې نږدې دریځ لري او په اسانۍ پرې توافق کېدلی شي. په لومړنیو خبرو کې بریا، که څه هم وړه وي، په راتلونکو خبرو ډېر مثبت اغېز کوي او همداسې په لومړنیو خبرو کې ناکامي، په راتلونکو خبرو ډېر منفي اغېز کوي. له همدې امله هر هغه ګام باید واخیستل شي چې د بریا چانس زیاتوي او ناکامي څنګ ته کوي.
اوس چې د خبرو پیل ته نږدې شوي یو، دواړه اړخونه هم باید یو د بل پر وړاندې د توندې ژبې کارونه، تورونه او آن بریدونه تر ممکنه حده راکم کړي. د حسن نیت او سوله ییزې فضا جوړولو لپاره له دواړو اړخونو د مثبتو کارونو تمه کېږي. ولس هم باید له دې پروسه سره د مرستې لپاره له یوه اړخه پر دواړو اړخونو فشار دوامداره وساتي او له بله اړخه دا پروسه له نږدې وڅاري او پرې نه ږدي چې د سولې مخالفین یې تخریب کړي.
