صلاح الدین رباني: افغان حکومت له طالبانو سره د هېچا پر حقوقو معامله نه کوي

افغان حکومت به له طالبانو سره د مذاکراتو پر مهال د هېچا پر حقوقو معامله و نه کړي. د بهرنیو چارو سرپرست وزیر صلاح الدین رباني پرون له یوې المانۍ ورځپاڼې سره د خبرو پر مهال ویلي، د ښځینه وو حقوقو او د نجونو زده کړې د افغان حکومت لپاره سره کرښه ده او هېڅ وخت به پر دغه مواردو معامله و نه کړي. هغه ټینګار کړی چې د افغانستان مسئله یوازې او یوازې د خبرو له لارې د حل وړ ده او نړیوالو ته په کار ده، چې په دې برخه کې د افغانانو تر څنګ ودرېږي. رباني وایي افغان حکومت سولې ته ژمن دی خو هغه سوله ورته د منلو ده چې د کلونو لاس ته راوړنې خوندي کړي او په افغانستان کې د ثبات سبب شي.