له طالبانو سره د سولې لپاره د رهبري شورا د جوړولو وړاندیز شوی دی. افغان حکومت د سولې د هڅو په درشل کې په دې برخه کې په نویو اقداماتو لاس پورې کړی دی. ولسمشر غني پرون له ځینو جهادي او سیاسي مشرانو سره په همدې اړه سلا مشوره کړې ده. سرچینې وایي چې په دې غونډه کې وړاندیز شوی، څو له طالبانو سره د خبرو لپاره د سولې رهبري شورا جوړه شي. دغه وړاندیز اجرایه رییس ډاکټر عبدالله عبدالله کړی دی، خو تر دې دمه نهایي شوی نه دی.
په ارګ کې باوري سرچینې ویلي، عبدالله عبدالله ټینګار کړی، چې له طالبانو سره د خبرو لپاره د متعددو ډلو او ګروپونو رامنځ ته کول دغه بهیر زیانمنوي، نو له همدې امله باید د سولې رهبري شورا جوړه شي او دوی به له طالبانو سره خبرې کوي. سرچینې زیاته کړې: ((د حکومت اجرایه رییس ډاکټر عبدالله عبدالله په دې ناسته کې وړاندیز کړی، چې د سولې رهبري شورا رامنځته شي او دغه شورا له طالبانو سره د سولې روانې خبرې پرمخ بوځي. دغه وړاندیز نهايي شوی نه دی او ښايي په نورو مجلسونو کې پرې خبرې وشي)).
ولسمشر غني پرون له پخواني ولسمشر حامد کرزي او نورو جهادي مشرانو سره پر سوله خبرې کړې دي او له دوی سره یې سلا مشورې کړې دي. په دې غونډه کې د سولې عالي شورا رییس استاد کریم خلیلي، دویم مرستیال سرور دانش، پخوانی جهادي مشر استاد سیاف او اجرایه رییس ډاکټر عبدالله عبدالله حاضر وو.
د ولسمشر یوه ویاند هارون چخانسوري له رسنیو سره په خبرو کې ویلي، چې په دغه غونډه کې د سولې په برخه کې د روانو هڅو او همدا راز په دې برخه کې د پاشلو فعالیتونو پر یو ځای کولو بحثونه او خبرې شوې دي. چخانسوري ویلي چې د دغو غونډو لړۍ به ادامه لري او له ډېرو نورو سیاسي مشرانو سره به هم د سولې په اړه سلا مشورې کېږي.
افغان حکومت داسې مهال دغه خبرې کوي چې امریکايي حکومت ترې د یوې ملي، ټولمنلي او بانفوذه هیئت جوړول غوښتي. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي وو، چې له افغان حکومته یې غوښتي چې له طالبانو سره د مذاکراتو لپاره یو ملي او ټولمنلی پلاوی جوړ کړي او په خبره یې دغه پروسه به ژر بشپړه شي.
ولسمشر د تېر کال په ډسمبر کې له طالبانو سره د خبرو اترو لپاره د سولې عالي مشورتي بورډ اعلان کړ، خو د دغه بورډ ډېری غړو د بورډ په ناستو کې برخه وانه خیسته. په دغه بورډ کې د حکومت پر مشرتابه او ځینو جګپوړو چارواکو سربېره، د ملي شورا د دواړو جرګو مشرانو، د دیني عالمانو د شورا رییس، د سولې عالي شورا د دارالانشا رییس او ځینو ملي، جهادي او سیاسي مشرانو ته غړیتوب ورکړل شوی و.
ولسمشرۍ ماڼۍ بیا وايي چې په دغه مجلس کې سیاسي او جهادي مشرانو د سولې په تړاو د یوه واحد دریځ په هدف له ولسمشر سره خپلې مشورې شریکې کړې دي. د هارون چخانسوري په خبره: ((ولسمشر نن په ارګ کې له پخواني ولسمشر حامد کرزي، استاد عبدالرب رسول سیاف، استاد دانش، استاد خلیلي او ډاکټر صیب عبدالله سره وکتل. په دې غونډه کې پر دې خبرې شوې چې باید د سولې په برخه کې پاشلې هڅې سره واحدې شي او دغه ډول غونډې دوام وکړي)).
خو سرچینې وايي چې د رهبري شورا په اړه د ډاکټر عبدالله عبدالله وړاندیز تر دې دمه نهایي شوی نه دی او په راتلونکو غونډو کې به خبرې ورباندې کېږي. بل پلو ټاکل شوې چې په اپریل میاشت کې د قطر غونډه هم جوړه شي. زلمی خلیلزاد چې ټاکل شوې کابل کې له افغان مشرانو سره خبرې وکړي، د قطر په راتلونکې غونډه کې پر بین الافغاني مذاکراتو له طالبانو سره بحثونه لري.
