عبدالله: افغانان نه غواړي بېرته تېرو تورو ورځو ته ستانه شي

اجراییه رییس عبدالله عبدالله وایي افغانان نه غواړي بېرته تېرو تورو ورځو ته ستانه شي. نوموړي چې نن یې په کابل کې د توبرکلوز پر وړاندې د مبارزې نړیوالې ورځې په مناسبت جوړې شوې غونډې ته خبرې کولې، د سولې روانې پروسې ته په اشارې وویل، افغانان سوله غواړي خو داسې سوله چې د ټولو حقونه پکې خوندي شي. نوموړي د خپلو خبرو پر دوام وویل سوله د افغان حکومت لومړیتوب دی او ټول افغانان سوله ته تږي دي خو په خبره یې هیڅ افغان دې ته لیوالتیا نه لري چې تېرو تورو ورځو ته ستانه شي. عبدالله که څه هم د طالبانو او امریکایانو ترمنځ د سولې له روانو خبرو ملاتړ وکړ خو زیاته یې کړه چې په دې خبرو کې باید تېرې اتلس کلنې لاسته راوړنې په بشپړه توګه خوندي شي. عبدالله دغه راز د توبرکلوز ناروغي پر وړاندې مبارزې ته ژمنتیا وښوده او زیاته یې کړه چې په دې برخه کې به هیڅ راز هڅې ونه سپموي.