یوه تازه سروې ښيي چې لا هم نیمايي افغانان د فقر تر کرښې لاندې ژوند کوي. سره له دې چې د ملي یووالي د حکومت مشرانو په تېره ولسمشر غني د خپلو ټاکنیزو کمپاینونو پر مهال د فقر د له منځه وړلو او د خلکو په دسترخوان کې د تغیر راوستلو خبره کوله، خو تازه سروې ښيي چې نږدې پنځوس سلنه افغانان له خورا ترینګلي اقتصادي وضعیت سره مخ دي او د فقر تر کرښه لاندې ژوند کوي. د دې سروې موندنې ښيي چې ۵۲ سلنه افغانان بېوزله دي او د ژوند لومړنیو اسانتیاوو ته لاسرسی نه لري.
د احصایې او معلوماتو ملي ادارې په افغانستان کې د بېوزلۍ په تړاو د خپلو موندنو نتایج تېره ورځ له رسنیو سره شریک کړل. د دې سروې له مخې، دا مهال د افغانستان ۵۲ سلنه وګړي د فقر تر کرښې لاندې ژوند کوي او له مخې یې ۵۸ سلنه بېوزله له ۱۸ کلونو ټیټ عمره ماشومان دي. د احصايې او معلوماتو ملي ادارې چارواکي وایي، چې د افغانستان خلک د ژوند بېلابېلو برخو کې د فقر ښکار دي. د دې ادارې معین حسیب الله موحد وایي، چې فقر په بېلابېلو برخو کې د افغانانو پر ژوند منفي تاثیر کړی دی او تر دې دمه یې د له منځه وړلو لپاره عملي شوو تګلارو ګټه نه ده لرلې.
د دې ادارې د موندنو له مخې، په کوچیانو کې د څو بعدیز فقر کچه لوړه ده، چې ۸۹ سلنې ته رسېږي. په ټوله کې د افغانستان ۸۳ سلنه وګړي په څو برخو کې د څو بعدیزې بېوزلۍ ښکار دي.
د اقتصاد وزیر د فقر ټولو اړخونو او ډولونو پر وړاندې د مبارزې ترڅنګ، د نویو پالیسیو او ستراتیژیو پر تدوین ټینګار کوي. مصطفی مستور په همدې غونډه کې د خبرو پر مهال وویل، چې دوی د اقتصاد د ودې او فقر د له منځه وړلو لپاره پلانونه طرحه کړي دي او نوې ستراتيژۍ به تدوین کېږي. نوموړي زیاته کړې: ((موږ نن د څو بعدیز فقر موضوع مطالعه کوو. نو له همدې امله څو بعدیزو ستراتيژیو ته اړتیا ده، چې دغه ستونزه له منځه یوسي)).
په ورته وخت کې نړیوال مرستندویه بنسټونه په افغانستان کې د فقر کچه ټکان ورکوونکې بولي او له دې وضعیت نه د وتلو لپاره د نویو لارو چارو د لټولو غوښتنه کوي. په سوېلي اسیا کې د یونسف د سیمه ییز دفتر رییسه جین ګاوف وایي: ((موږ په افغانستان کې د فقر د کچې په اړه، په تېره بیا د بېوزله ماشومانو په اړه چې ۶۰ سلنې ته رسېږي اندېښنه لرو)).
د اکسفورډ پوهنتون د بشري پراختیا د څانګې رییسه، سبینا الکایر بیا وايي، په افغانستان کې څو بعدیز فقر د دغه پدېدې ژوروالی ښيي، نو ځکه باید د اغېزمنو پالیسیو او څارنې له لارې دغه پديده ورکه کړل شي.
د دې سروې له مخې، په پلازمېنې کابل کې د فقر کچه ټيټه ده، چې ۱۲ سلنه کېږي او په بادغیس کې د نورو ولایتونو په پرتله تر ټولو لوړه ده، چې ۸۱ سلنې ته رسېږي. د بېوزلۍ کچې د زیاتوالي په تړاو دغه راپور داسې مهال دی، چې د ملي وحدت حکومت مشرانو د بېوزلۍ کچې د کمولو په برخه کې ډېرې ژمنې کړې وې، خو د دې سروې پایلې ښيي چې حکومتي مشران د خپلو ژمنو په عملي کولو کې بریالي نه وو.
