د ولسي جرګې ادارې هیئت وايي، د پارلمان د پرانیستې مخنیوی پخپله ولسمشر غني کړی دی. د ولسي جرګې د منشي مرستیال وایي، د حوت میاشتې پر پنځلسمه د ملي شورا د پرانیستې لپاره بشپړ چمتووالی نیول شوی و، خو د ولسمشر غني تر مخالفت وروسته یې پرانیسته ونه شوه. د ملي شورا غړي بیا وایي، په داسې حال کې چې حکومت د مشروعیت له بحران سره مخ دی، د مقننه قوې نشتوالي ډېرې ستونزې پیدا کوي.
خو د ولسي جرګې برحاله وکیلان د اوسني پارلمان د پرانیستې په اړه د بشپړ چمتووالي خبره کوي، خو نیوکه کوي چې د پارلمان د نه پرانیستې غوښتنه په خپله ولسمشر غني کړې ده. د ولسي جرګې اداري هیئت وايي، ټاکل شوې وه چې د کب پر پنځلسمه د ملي شورا نوی تقنیني کال پرانیستل شي، خو د ولسمشر تر مخالفت وروسته پرانیسته وځنډول شوه. د ولسي جرګې د منشي مرستیال عرفان الله عرفان ویلي: ((د کب میاشتې په لومړیو کې ولسي جرګې ته پر تللو سړکونو او دلته په ولسي جرګه کې ټول تیاری نیول شوی و. بیرغونه لګول شوي وو. کارتونه لېږل شوي وو، دارالانشا ټول تیاری نیول و، خو ولسمشر د دغه کار مخالف وکړ، وبه ګورو چې ولسمشر څه کوي)).
د ولسي جرګې غړي وايي، تېرې ټاکنې له درغلیو ډکې وې او وروستۍ پایلې هم نه دي اعلان شوې، نو حکومت ته پکار وه، چې پارلمان یې د برحاله وکیلانو په حضور سره پرانیستی وای، خو دا کار ونه وشو.
د دوی په خبره، حکومت د مشروعیت له بحران سره مخ دی او پارلمان ته جدي اړتیا لیدل کېږي، خو حکومت بیا هم په وار وار قانون نقضوي. ولسمشر ته پکار ده، چې خپله پرېکړه بېرته واخلي. د ولسي جرګې غړي جعفر مهدوي په دې اړه ویلي: ((اوسنۍ ټاکنې خو له درغلیو ډکې وې، ډېرو ته د منلو وړ نه دي، تر اوسه نوي وکیلان نه دي معرفي شوي، نو ولسمشر ته پکار وه، چې د برحاله وکیلانو په حضور کې یې ملي شورا پرانیستې وای)).
له دې سره د ټاکنو خپلواک کمېسیون وایي، چې د پارلمان د پرانیستې مسئله په دوی پورې تړاو نه لري، خو د ټولو نهايي پایلو تر اعلان وروسته، حکومت باید د ملي شورا د پرانیستې تصمیم ونیسي. د دغه کمېسیون مرستیال ویاند ذبیح الله سادات ویلي: ((کمېسیون جدي کار کوي، چې د ټاکنو وروستۍ پایلې ژر تر ژره اعلان کړي او د نوو وکیلانو په حضور کې به پارلمان پرانیستل شي)).
د ملي شورا نه پرانیستلو په اړه اندېښنې داسې مهال دي، چې هر کال د کب یا حوت میاشتې پر پنځلسمه د ولسمشر او یا د هغه د مرستیال له لوري د ملي شورا نوی تقنیني کال پرانیستل کېږي، خو دا ځل د تېرو ټاکنو د پایلو د جنجالي کېدو له امله له یوه مبهم حالت سره مخ دی.
