ولسمشر غني د روان کال لپاره د خالد عملیاتو پلان تصویب کړی

په داسې حال کې چې وسله والو طالبانو تر دې دمه په رسمي توګه پسرلني عمليات نه دي اعلان کړي ، خو د ولسمشر غني په مشرۍ امنيتي ناستې د روان ۱۳۹۸ لمریز کال لپاره د خالد په نامه د پراخو عملیاتو پلان تصویب کړی دی. له ارګه په خپرې شوې خبرپاڼه کې راغلي، په ننۍ ناسته کې چې د امنیتي سکتور رهبرۍ هم پکې حضور درلود، ددې پلان پر جزییاتو مفصل بحثونه شوي دي. سرچینه کاږي دا عملیات په ټول هېواد په ځانګړې توګه د ښارونو او لویو لارو د امنیتي وضعیت د ښه والي، د دښمن د ځپلو، له ګواښ سره مخ سیمو د پېژندلو، د ټاکنو د امنیت، د ملکي تلفاتو د مخنیوي او د ځواکونو د سم سمبالښت په موخه تطبیق او عملي کېږي.