تر ولسمشریزو ټاکنو مخکې باید د سولې په برخه کې توافقات رامنځ ته شي. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په خپله تازه مرکه کې ویلي، سوله او ټاکنې دواړه د افغانستان لپاره مهم دي، خو ښه به وي چې ټاکنې تر سولې او یا په دې برخه کې تر توافقاتو وروسته ترسره شي.
له میاشتو راهیسې د طالبانو او امریکايي حکومت ترمنځ د سولې مذاکرات روان دي او هڅه کېږي چې دواړه لوري یو لړ هوکړو ته سره ورسېږي. د افغان سولې لپاره ګومارل شوي امریکایي ډيپلومات زلمي خلیلزاد هڅې پيل کړې دي، چې د بین الافغاني مذاکراتو لپاره لار هواره کړي او تر څنګ یې په افغانستان کې روانه جګړه ودروي. خو د سولې تر څنګ، د ملي یووالي حکومت د مشروعیت له ګواښ او ټاکنې له بنبست سره مخ دي. زلمی خلیلزاد بیا وایي چې ټاکنې او سوله دواړه د افغانستان لپاره مهم دي، خو سولې ته باید تر ټاکنو ارزښت ورکړل شي.
خلیلزاد له ازادي رادیو سره په یوه مرکه کې ویلي، د سولې او ټاکنو لپاره موازي کار روان دی، خو تر دې وړاندې هم څو ځله ټاکنې ځنډېدلې دي، نو ځکه خو پکار ده، چې ټاکنې تر سولې او یا په دې برخه کې د ځینو هوکړو تر رامنځ ته کېدو وروسته ترسره شي. خلیلزاد ویلي: ((د ټاکنو او سولې لپاره دې په یوه وخت کې تیاری ونیول شي. زه د دې پلوی یم چې د افغان حکومت او طالبانو ترمنځ تر ټاکنو مخکې یو توافق وشي. پر هر پروګرام چې هوکړه کېږي، هغه پروګرام باید عملي شي. ټاکنې دوه ځله ځنډول شوې دي، نو که هوکړه و نه شي، ټاکنې دې ترسره شي)).
زلمی خلیلزاد همدا راز وایي، له وسله والو طالبانو سره په څلورو مسایلو خبرې شوې، چې هیله لري راتلونکي پړاو مذاکراتو کې پرې توافق وشي. د ده په خبره، طالبان تر بین الافغاني مذاکراتو وروسته اوربند غواړي، خو د متحده ایالاتو هیئت هڅه کوي، چې تر بین الافغاني مذاکراتو مخکې جنګ کم یا ختم شي. خلیلزاد ویلي: ((د اوربند په اړه طالبان وايي چې باید تر بین الافغاني خبرو وروسته وشي؛ خو موږ کوښښ کوو چې تر بین الافغاني مذاکراتو مخکې اوربند رامنځ ته شي او یا هم جګړه راکمه شي)).
د افغانستان د سولې مسئله په دې وروستیو کې نه یوازې په رسنیو، سیاسي څېرو، ګاونډیو هېوادونو بلکې د مدني بنسټونو ترمنځ همه په تاوده بحث بدله شوې ده. تېره ورځ هم ډېرو مدني بنسټونو د سولې په اړه غونډې او خبري کنفرانسونه لرل. د سولې کور په نامه یوه مدني حرکت وویل، په افغانستان کې روانه جګړه امریکا پيل کړې ده او باید دغه هېواد روانه جګړه ختمه کړي. دوی د امریکا پر نورو ملګرو او جګړه کې شریکو ملګرو هم غږ کړی، چې دلته د جګړې په پای ته رسولو کې هڅه وکړي.
بل پلو د سولې عالي شورا د دارالانشا رییس محمدعمر داوودزي په یوه غونډه کې د خبرو پر مهال ویلي، چې د ملي یووالي حکومت سولې ته ژمن دی، د مذاکراتو لپاره هېڅ راز شرط نه لري، خو د مصالحې لپاره بیا خپل شرایط لري. د ده په خبره، د سولې په اړه به د افغانانو ملي دریځ د مشورتي لویې جرګې په جوړېدو سره روښانه شي. هغه وویل، په دې جرګه کې به ټول اړخونه ګډون کوي او ان هیله لري چې طالب استازي هم په دغه ملي مشورتي لویه جرګه کې ګډون وکړي.
