پاکستاني پولیسو پېښور کې ۴۶ افغان کډوال نیولي

پاکستاني رسنۍ وایي چې پولیسو په پېښور کې لسګونه افغان کډوال نیولي دي. د (دې نیوز) ورځپاڼې د راپور له مخې، دا ۴۶ تنه افغان کډوال په پېښور کې د غیر قانوني استوګنې په تور نیول شوي دي. یو پولیس چارواکي ویلي چې یاد کسان دغه راز په ځینې جنایي پېښو کې په لاس لرلو هم تورن شوي دي. د پولیسو په خبره دا کسان به ژر تر ژره محکمې ته معرفي شي. پاکستاني چارواکو ویلي، په پاکستان کې د غیر قانوني افغان کډوالو د نیونې بهیر په ۲۰۱۶ میلادي کال کې پیل شوی او اوس هم دوام لري. دا په داسې حال کې ده چې د پاکستان لومړي وزیر عمران خان د خپلې کمپایني مبارزې په وخت کې افغان کډوالو ته پر سهولتونو ټینګار کاوه خو واک ته د نوموړي له رسېدو سره سم پر افغان کډوالو فشارونه لا ډېر شوي دي.