د بادغیس ولایتي شورا وایي، طالبانو په بالامرغاب ولسوالۍ کې د افغان ځواکونو پر پوستو بریدونه کړي دي. ددې ولایت د ولایتي شورا رییس، عبدالعزیز بیګ وايي، طالبانو تېره شپه یو ځل بیا د افغان ځواکونو پر پوستونه بریدونه کړي او افغان ځواکونو ته یې مرګ ژوبله اړولې ده. بیګ وايي، طالبانو یو شمېر افغان سرتېري نیولي هم دي. د نوموړي په خبره د امنیه قومندانۍ او د ملي اردو د کنډک ودانیو پرته، د بالامرغاب ولسوالۍ ډېرې سیمې د طالبانو لاسته لوېدلې دي. د ولایتي شورا رییس وايي، په بالامرغاب ولسوالۍ کې کابو ۵۰۰ امنيتي ځواکونه مېشت دي او که مرستندویه ځواک ور ونه رسیږي، نو په دې ولسوالۍ کې به ناورین رامنځته شي. خو د ملي دفاع وزارت وايي، افغان ځواکونو د بالامرغاب ولسوالۍ د نښتې په سیمه کې ملکي کسانو ته د مرګ ژوبلې د مخنیوي له کبله تکتیکي شا تګ کړی دی. یاد وزارت زیاتوي چې سیمې ته مرستندویه ځواک رسېدلی او سخته نښته روانه ده.
