نیوکلاس کې: د سولې په برخه کې د پام وړ پرمختګ شوی دی

په افغانستان کې د ناټو د غوڅ ملاتړ ماموریت ملکي استازي نیکولاس کې ویلي، د افغان سولې په برخه کې په دې وروستیو ورځو کې د پام وړ پرمختګ شوی دی. دده په خبره ناټو په افغانستان کې د سولې ملاتړ کوي او ټول دا غواړي چې دلته دایمي سوله او ثبات راشي. نیکولاس کې همدا راز د ناټو ځواکونو د وتلو په اړه ویلي، چې تر دې دمه پر دغه مسئله هېڅ راز بحث نه دی شوی. دده په خبره ناټو او امریکا په ګډه افغانستان ته راغلي او په ګډه به له دغه هېواد وځي. هغه ټينګار وکړ چې د ځواکونو د وتلو پر مسئله تر اوسه له هېچا او هېڅ ډلې سره هېڅ راز بحث نه دی شوی. خو وسله وال طالبان چې له امریکا سره د سولې پر خبرو لګیا دي، د خپلو مذاکراتو او سولې تر ټولو ستر شرط د بهرنیو ځواکونو وتل بولي.