د سولې او اعتدال ټاکنیزه ډله: لویه جرګه فرمایشي ده او مشخصه اجنډا نه لري

د هېواد د ملي امنیت د پخواني سلاکار محمد حنیف اتمر په مشرۍ د سولې او اعتدال ټیم وایي، د سولې مشورتي لویه جرګه تر ډېره د حکومت لخوا فرمایشي ده او په دې اړه له سیاسي جریانونو سره سلا مشورې نه دي شوې. د سولې او اعتدال ټیم لخوا په خپرې شوې اعلامیه کې راغلي. دا جوړېدونکي جرګه ددې پر ځای چې مشورتي وي، سفارشي ده چې ترسره کېدل به یې ګټه ونه لري. سرچینه کاږي، ددې سفارشي او فرمایشي جرګې هدف خلکو ته معلوم نه دی او هیڅ مشخصه اجنډا نه لري. د سرچینې په خبره، ددې جرګې ګډونوال هم د حکومت له لوري ټاکل کېږي چې په هیڅ صورت له یو ملي ترکیب نه نمایندګي نه شي کولی. سولې او اعتدال ټیم له حکومته غوښتنه کړې چې په دې حساس وخت کې په یوازې ځان پرېکړې ونه کړي او په دغه راز مهمو پرېکړو کې باید له سیاسي احزابو او مخورو سره وخت پر وخت مشورې او ناستې وکړي.