د ارګ په غونډه کې د سولې رهبرۍ شورا پر طرحه او ترکیب توافق نه دی شوی. سره له دې چې په دې وروستیو کې د سولې خبرې تودې دي، خو داسې ښکاري چې افغان حکومت په دې برخه کې د سیاسیونو د ځینو اقداماتو مخه نیسي. امریکا له طالبانو سره د خپلو مذاکراتو په اوږدو کې له افغان حکومته غوښتي وو، چې له طالبانو سره د مخامخ مذاکراتو لپاره باید یو بې طرفه، ټولمنلی او رښتینی ټیم وګوماري. امریکا ټینګار کاوه، چې دغه ټیم باید د ولس استازیتوب وکړي او د افغانانو خبرې دې وکړي. په همدې لړ کې ځینو سیاسیونو په تېره اجرایه رییس ډاکټر عبدالله عبدالله او د حزب اسلامي مشر ګلبدین حکمتیار د سولې په باره کې د یوې رهبرۍ شورا د جوړېدو غوښتنه وکړه. هغه مهال داسې ویل کېدل چې ښایي دغه شورا جوړه شي او په هغه کې د افغانانو رښتیني استازي ګډون وکړي؛ خو د ارګ په پرونۍ غونډه کې د سولې رهبرۍ شورا پر جوړښت او ترکیب توافق نه دی شوی.
په ارګ کې پرون د سیاسي او جهادي مشرانو مجلس جوړ شوی و او ولسمشر غني دغه مجلس ته وینا هم وکړه. تېره اونۍ داسې راپورونه خپاره شوي وو، چې حکومت غواړي د سولې په روانو خبرو کې د نفوذ په هدف، د جهادي او سیاسي مشرانو، مدني ټولنې او ځوانانو په ګډون د سولې رهبرۍ شورا په نامه یو نوی تشکیل رامنځته کړي، خو ارګ کې په دې اړه په دواړو مجلسونو کې پر دې طرحه همغږي نه ده رامنځته شوې.
په پرونۍ ناسته کې د ولسمشر غني، پخواني ولسمشر حامد کرزي ترڅنګ، ډېرو سیاسي او جهادي مشرانو ګډون کړی و. دوی تمه لرله چې افغان حکومت به د رهبرۍ شورا په اړه پرېکړه وکړي او په دې اړه به یو توافق رامنځ ته شي، خو دا کار نه دی شوی. بلخوا ولسمشر غني بیا ویلي، هغو کسانو ته به له وسله والو طالبانو سره په مذاکراتو کې د ګډون چانس ورنه کړل شي، چې د اوسني نظام خلاف وي. غني ویلي: ((د هغه افرادو له ټاکلو دې ډډه وشي، چې په واضح ډول د تېرو اتلسو کلونو د لاس ته راوړنو پر ضد غږېږي، د ولسواکۍ پر ضد غږېږي او د نظام پر ضد څرګندونې کوي)).
ولسمشر د سولې په نامه رهبرۍ شورا لپاره له خپله اړخه یو ۳۷ کسیز ترکیب جوړ کړی، چې د سیاسي او جهادي مشرانو په ګډون، ډېر ځوانان او د مدني ټولنو او ښځو د حقونو فعالانې پکې شامل دي، خو پر دغه ترکیب اعتراض دی.
د حزب اسلامي مشر ګلبدین حکمتیار دغه مجلس ته نه و تللی او اجرایه رییس ډاکټر عبدالله عبدالله، چې د داسې یوې طرحې وړاندیز یې کړی و، په یوه بهرني سفر بوخت دی. بلخوا اجرایه رییس ډاکټر عبدالله عبدالله بیا په اردون کې له ټي ار ټي ټلوېزیون سره د خبرو پر مهال ویلي، چې په نږدې ورځو کې به د سولې رهبرۍ شورا جوړه شي. د نوموړي په خبره، افغانان سولې ته نږدې شوي دي او دغه شورا به په نږدې وخت کې خپل فعالیت پيل کړي.
په ورته وخت کې د سولې عالي شورا د دارالانشا رییس عمر داوودزی وایي، چې د سولې عالي شورا رییس محمدکریم خلیلي د سولې رهبرۍ شورا پر نوي ترکیب کار کوي. عمر داوودزي ویلي: ((په دې اړه استاد کریم خلیلي د یوې کمېټې په مشرۍ کار کوي او د سولې د رهبرۍ شورا لپاره د وړاندیز شوو کسانو نوملړ به راتلونکې غونډې ته د تایید لپاره وړاندې کړي)).
د ارګ د یکشنبې ورځې په مجلس کې د سولې رهبرۍ شورا پر طرحې او ترکیب د توافق نشتوالی داسې مهال دی، چې ولسمشرۍ ماڼۍ وايي، پرونۍ غونډه د سولې رهبرۍ شورا لومړنۍ غونډه وه.
