نشنل انټرسټ: افغانستان د حمدالله محب د چلند له کبله ستره بیه پرې کوي

نشنل انټرسټ نشریه لیکي وروسته له هغه چې د افغانستان د ملي امنیت شورا سلاکار حمد الله محب په امریکا کې د زلمي خلیلزاد په اړه ځینې غیر ديپلوماتیکې څرګندونې وکړې، د امریکا او افغان حکومت ترمنځ اړیکې ښې نه ښکاري. په مقاله کې راځي، د امریکا د بهرنیو چارو وزیر په دې حساسو شرایطو کې خپلو ديپلوماتیکو او نظامي چارواکو ته امر کړی چې حمد الله محب سره به نه ګوري او همدا راز به په هېڅ هغه سیاسي او نظامي غونډه کې ګډون نه کوي چې حمد الله محب پکې حضور ولري. نشریه لیکي په داسې حساسو شرایطو کې چې د افغان حکومت او امریکا ترمنځ نږدې اړیکو ته جدي اړتیا لیدل کېږي د محب د چلند له امله افغانستان ستره بیه پرې کوي. نشنل انټرسټ لیکي ددې اړتیا ده، چې افغان حکومت او امریکا په دې مسئله سره سلا شي، ځکه له یوې خوا د جګړې نوی فصل پيل شوی او له بلې خوا له طالبانو سره خبرې روانې دي، چې په دواړو حالتونو کې د دواړو لورو ترمنځ نږدې اړیکو ته اړتیا ده. حمد الله محب څه موده وړاندې په امریکا کې ویلي وو، چې زلمی خلیلزاد د ځان لپاره کار کوي او غواړي ځان په افغانستان کې واک ته ورسوي خو دې مسئلې د امریکا سخت غبرګون له ځان سره درلود.