ملګري ملتونه: په روانو مذاکراتو کې د ښځینه وو نظر او دریځ مهم دی

افغانستان کې له لسګونه هوکړو او ژمنو سره سره بیا هم د ښځو حقوق نه دي تامین شوي. ملګري ملتونه وایي سره له دې چې افغان حکومت د ښځو د حقوقو په برخه کې له ملګرو ملتونو سره لسګونه هوکړې لري خو بیا هم ددوی حقوق نه دي تامین شوي او په ډېری مسایلو کې ښځينه وو ته د نظر او دريځ لرلو اجازه نه ورکول کېږي. د افغانستان لپاره د ملګرو ملتونو استازي تادامیچي یاممتو ویلي چې د سولې به خبرو او نورو اړوندو مسایلو کې دې ښځو ته د نظر او دريځ لرلو حق ورکړل شي. بل پلو د افغانستان د بشري حقونو د خپلواک کمیسیون مشرې سیما سمر هم ویلي چې له طالبانو سره په روانو خبرو کې دې د ښځو ونډه په پام کې ونیول شي. سمر وايي چې له ګلبدین حکمتیار سره د خبرو او مصالحې پر مهال له افغان ښځینه وو سره هېڅ راز مشورې و نه شوې نو له طالبانو سره په خبرو کې دې ارو مرو د ښځينه وو نظر واخیستل شي.