هلمندیان: وضعیت له کنټروله وځي؛ حکومت دې ژر تر ژر نیول شوې مېرمنې خوشې کړي

په هلمند کې د ګډو ځواکونو عملیاتو کې ملکي وګړو ته مرګ ژوبله اوښتې ده. د راپورونو له مخې ګډو ځواکونو د هلمند په نادعلي ولسوالۍ کې پر یوه کور چاپه وهلې ده او ددغه کور مالک یې له دوو مېرمنو سره یو ځای له ځان سره وړی دی. د نادعلي قومي مشران، ځوانانو او مدني فعالانو په همدې تړاو له پرون راهیسې لاریون کړی دی او پر حکومت غږ کوي چې دغه کسان ژر تر ژره خوشي کړي. ځايي خبریالانو له سپوږمۍ راډيو سره په خبرو کې وویل، چې لاریون تر اوسه روان دی. بل پلو قومي مشرانو د هلمند له والي سره په تلیفوني خبرو کې ویلي، چې ژر تر ژره دې نیول شوي کسان له بنده خوشي کړي. ددوی په خبره ګډو ځواکونو مېرمنې له ځان سره وړې دي او دا د هلمندیانو د عزت او ابرو مسئله ده. ویل کېږي چې لاریون ټوله شپه روان و. والي له لاریون کوونکو سره ددغه کسانو د خلاصون ژمنه کړې ده خو تر دې دمه یې عملي اقدام نه دی کړی دی. دوی حکومت ته ګواښ کړی دی، که یې حکومت غږ وا نه وري، نو د ولسونو غوسه به له کنټرول ووځي. په دې اړه نور جزیات وروسته وړاندې کېږي.