بلوڅ ملتپال ګوندونه: ترهګري په اغزن تارونو نه په تګلاره ختمېدلی شي

په پاکستان کې بلوڅ ملت پالو ګوندونو د پاکستاني حکومت پر دې اعلان چې ویلي یې دي له ایران سره پر پوله به هم د افغانستان په څېر اغزن تار وغځوي غبرګون ښودلی دی. دوی ویلي، ترهګري په اغزن تارونو له منځه نه ځي بلکې دا کار غوره تګلارې ته اړتیا لري. په ورته وخت کې د پوځ سیمه ییز مشر جنرال عاصم سلیم ویلي چې د اغزن تار له غځولو نه موخه د دواړو هېوادونو ترمنځ د ترهګرو د تګ راتګ او د ناقانونه تجارت مخنیوی دی. خو په بلوچستان کې د نیشنل ګوند مشر ډاکټر جهانزیب ویلي، دوی د دې ګام غندنه کوي. هغه ویلي له افغانستان سره د پولې دواړو غاړو ته پښتانه اوسېږي او د ایران پولې دواړو غاړو ته بلوڅان چې د اغزن تار په غځولو سره هغوی له یو بل سره بېلېږي او دوی به هیڅکله د پاکستان دې کار ته اجازه ورنه کړي. نوموړي ټینګار کړی دی چې پاکستان باید د ترهګري د له منځه وړلو لپاره نورې تګلارې غوره کړي، ځکه د هغه په خبره د ملتونو بېلول د پاکستان په ګټه نه دي او دا کار به ستونزې لا ډېرې کړي.