د هلمند د نادعلي ولسوالۍ لسګونو اوسېدونکو د ګډو ځواکونو د هغو عملیاتو په غبرګون کې پرون لاریون کړی و، چې له امله یې ملکي خلک وژل شوي او دوې مېرمنې یې له ځانه سره بېولې دي.
د دغه ولایت یوه لاریونوال په دې اړه وویل: « په ډېر ظلم او وحشت یې زموږ تور سرې له کوره را ایستلې دي، وېښتان یې شکولي دي او په زوره یې له ځانه سره وړي دي».
د هلمند د باباجي سیمې اوسېدونکو ويلي، چې افغان او بهرنیو ځواکونو د ملکي خلکو پر کورونو عملیات کړي، چې په پایله کې یې ملکي کسان وژل شوي او دوې مېرمنې یې له ځان سره بيولې دي.
د سیمې خلکو ویلي چې که حکومت په دې تړاو ژر اقدام ونه کړي او په راتلونکي کې د دا ډول پېښو مخه ونه نیسي، خطرناکې پایلې به ولري.
په ملي شورا کې د هلمند د خلکو استازي وایي چې د طالبانو په نوم د بې ګناه خلکو پر کورونو چاپې وهل او له ځانه سره د مېرمنو بیول د افغاني کلتور خلاف کار دی او دغه څه ناوړه پایلې درلودلی شي.
پخواني ولسمشر حامد کرزي دغه عملیات د افغاني دودونو خلاف او بشري ضد عمل ګڼلی او پر حکومت یې غږ کړی، چې نیول شوي کسان په عزت او احترام سره بېرته خوشې کړي.
بلخوا د بشري حقونو سازمان هم یاده پېښه جنګي جنایت بللې او د جرمونو له نړیوالې محکمې یې غوښتي، چې په دې تړاو جدي پلټنې وکړي او عاملان یې د قانون منګولو ته وسپاري.
د بشري حقونو سازمان رییس لعل ګل لعل ویلي: «دا د بشر پالنې د نړیوال قانون له مخې جنګي جنایت دی او په دې اړه باندې حکومت او جمع نړیوال بنسټونه چې هغه د جنګي جرمونو نړیواله محکمه ده، هغې ته پکار دي چې د دې پېښې څېړنه وکړي او عاملینو ته یې سزا ورکړي».
په ورته وخت کې د هلمند والي له لاریون کوونکو سره د ټلیفون له لارې په خبرو کې ډاډ ورکړی، چې دا پېښه به په هر اړخیزه توګه څېړل کېږي او د بیول شویو کسانو په خلاصون کې به ژر اقدام وشي.
