سره له دې چې د ملي یووالي حکومت پنځه کلنه موده مخ پر خلاصېدو ده، خو حکومتي مشران په دې بریالي نه شول، چې تر پایه خپله کابینه مکمله کړي. د ملي یووالي حکومت د مشرانو ترمنځ د وېش پر سر اختلافونه او ستونزې د دې سبب شوې، چې د ملي یووالي حکومت نیمايي وزارتونه د سرپرست وزیرانو له لوري اداره شي.
د مسیر ورځپاڼې د معلوماتو له مخې، تر اوسه د ملي یووالي د حکومت ۱۲ وزارتونه د سرپرستانو له لوري اداره کېږي؛ خو ۱۲ هغه یې پر دې بریالي شوي چې د ولسي جرګې د باور رایه خپله کړي. د سرپرستانو له لوري د وزارتونو اداره کول نه یوازې قانوني ستونزې لري، بلکې د کارونو د ځنډېدو او ستونزو د جوړېدو سبب هم کېږي.
د ولسي جرګې غړی عبدالقادر قلاتوال وايي، چې ائتلافي حکومتونه تل له ورته ستونزو سره مخ وي او د مشرانو ترمنځ یې د نظر اختلافونه د دې سبب کېږي، چې کمزوري حکومتونه او حکومتي ادارې رامنځ ته شي. نوموړی وايي: ((د وزیرانو پر سر نه سره جوړېدل، د نظر اختلاف موجود و، له همدې امله په غیر قانوني توګه وزیرانو تر دوو میاشتو زیات سرپرستۍ ته ادامه ورکړه)).
د ملي یووالي حکومت له پیل سره سم، ژمنه کړې وه چې دوی به د خلکو د هوساینې او هېواد د پرمختګ لپاره په کار پوه او وړ کابینه ولس ته جوړوي، خو وروسته د اجرایه ریاست او ولسمشرۍ ماڼۍ ترمنځ وېش په کابینه کې ستونزې جوړې کړې، چې اوس هم د خلکو نیوکې له ځان سره لري.
