عبدالله: د خلاصون یوازینۍ لار خبرې دي ټول اړخونه باید سره کېني

اجراییه رییس عبدالله عبدالله ویلي چې د روانې افغان کشالې یوازینۍ حل لاره د سولې خبرې دي او باید ټول اړخونه خبرو ته سره کېني. هغه له اسوشیټیډ پرس خبري اژانس سره په مرکه کې ویلي، کله چې طالبان له تاوتریخوالي لاس واخلي کولی شي د یو سیاسي حزب په توګه راڅرګند او حتی په ټاکنو کې ګډون وکړي. نوموړي زیاته کړې که چېرته طالبانو ته افغانانو رایه ورکړه نو کولی شي په هره سطحه یې استازولي هم وکړي. هغه که څه هم له طالبانو سره پر مخامخ خبرو ټینګار کړی خو زیاته کړې یې ده چې تېرې لاسته راوړنې باید خوندي شي. عبدالله دغه راز د سولې په روانو مذاکراتو کې د ښځو رول هم پام وړ مهم بللی دی او ویلي یې دي چې ښځو ته هم باید په دې خبرو کې د ګډون او نظر حق ورکړل شي.