د حکومت او طالبانو له لوري د عملیاتو اعلان د ولس او شنونکو له غبرګون سره مخ شوی دی. د سولې په تودو خبرو او منډو ترړو کې افغان حکومت او وسله والو طالبانو تازه د عملیاتو اعلان کړی دی. حکومت د کال له پیل سره سم د خالد په نوم د عملیاتو اعلان وکړ، خو وسله والو طالبانو بیا د تېرې جمعې په ورځ وویل، چې په ټول هېواد کې د الفتح په نامه پوځي عملیات کوي. حکومت وايي، دوی د پوځي عملیاتو نه؛ بلکې د امنیتي پلان اعلان کړی و او دا د حکومت مسلم حق دی، خو طالبان غواړي د حکومت له اعلان څخه ځان ته د جګړې توجیه جوړه کړي.
بل پل په هېواد کې پوځي او سیاسي شنونکي پر دې باور دي، چې روانه جګړه یوازې د افغان وژنې جګړه ده او هېڅ ډول توجیه نه لري. د دوی په خبره، د حکومت او طالبانو له لوري د عملیاتو اعلان د سولې هڅې زیانمنوي او زیان یې یوازې عامو افغانانو ته اوړي. دوی پر حکومت او طالبانو غږ کوي چې جګړه ودروي او د سولې خبرو ته شدت ورکړي. بل پلو سیاسي څېرو او بهرنیو رسنیو هم پر دې مسئله جدي غبرګون ښودلی دی او په هېواد کې یې د دواړو لورو ترمنځ د عملیاتو پر اعلان نیوکې کړې دي.
د پوځي چارو شنونکي بیا وايي چې د سولې په دې حساسه مرحله کې د عملیاتو اعلانول په لوی لاس په هېواد کې د جنګي فضا رامنځ ته کول او د هېواد ورانول دي. د پوځي مسایلو شنونکی میرزا محمد یارمند ویلي: ((دا په لوی لاس د جنګي فضا رامنځ ته کول دي. تاسې وګورئ جګړې ته هېڅ راز توجیه نشته ده. ټول مسایل د خبرو له لارې د حل وړ دي. نړۍ په دې باور ده چې مذاکرات باید دا جګړه ختمه کړي؛ خو هغه کسان چې د جګړې په ډګر کې لګیا دي، دوی اړ شوي، دوی اړ دي چې جګړه وکړي، له همدې امله خو د سولې او مذاکراتو د چټکتیا اړتیا ده)).
د ولسي جرګې غړي هم پر دې باور دي چې په دغو حساسو شرایطو کې د جګړو او عملیاتو د پیل اعلان ته اړتیا نه وه او باید مسایل د خبرو له لارې حل شوي وای. د ولسي جرګې غړي محمد داوود کلکاني ویلي: ((اوس پر یو بل د ځان پیاوړي ښودلو لپاره جګړې پیل شوې دي. دوی غواړي چې د مذاکرې پر مېز تر یو بل ډېر امتیازات واخلي، نو ځکه یې جګړې پیل کړې دي)).
په ورته وخت کې بیا پخواني ولسمشر حامد کرزي په یوه اعلامیه کې د حکومت او طالبانو له لوري د خالد او الفتح عملیاتو اعلان په کلکو ټکو غندلی دی. د کرزي په خبره، په داسې حال کې چې نړیوال په افغانستان کې د سیاسي حل په هڅه کې دي، د دغه ډول عملیاتو پيل د هېچا په ګټه نه دی. هغه زیاته کړې چې روانه جګړه د افغان وژنې جګړه ده او د دې اړتیا ده چې باید د خبرو او مذاکراتو پر مټ حل کړل شي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم دغه علمیات غندلي دي. هغه په یوه ټوېټ کې پر قطر او د سیمې پر نورو هېوادونو غږ کړی، چې د طالبانو له لوري د عملیاتو اعلان وغندي او دوی وهڅوي، چې د خبرو له لارې روانه جګړه ختمه کړي. خلیلزاد ویلي: ((موږ د وسلوالو طالبانو د الفتح په نوم د پسرلنیو عملیاتو پیلېدل غندو، دا د طالبانو بې باکي او د ټولو افغانانو د سولې د غوښتنې په اړه د هغوی د مشرانو بې پروايي ده او له پاکستان، قطر او نور هېوادونو چې د افغانستان د سولې د بهیر ملگري دي غواړي، چې دا عملیات وغندي)).
وسله والو طالبانو داسې مهال د الفتح عملیاتو د اعلان خبره کړې، چې ټاکل شوې په اپرېل میاشت کې یو ځل بیا له امریکايي استازو سره مخامخ خبرې وکړي.
