ډاکټر عبدالله عبدالله او ټاکنیز ټیم یې د سولې له مشورتي لویې جرګې سره پرېکون اعلان کړی دی. وروسته له دې چې امریکا د افغان سولې لپاره هڅې پيل کړې، پر افغان حکومت یې دا شرط کېښود، چې له طالبانو سره به د مذاکراتو لپاره یو واضح، ملي او ټولمنلی دریځ رامنځ ته کوي. همدا راز به افغان حکومت په افغانستان کې ملي او رښتینو شخصیتونو ته زمینه برابروي، چې د سولې په خبرو کې برخه واخلي او خپل نظریات شریک کړي. په همدې تړاو حکومت د سولې رهبري شورا جوړه کړه او تر څنګ یې ټاکل شوې چې په ثور میاشت کې د سولې مشورتي لویه جرګه هم جوړه شي. ډېری سیاسي ګوندونه نه یوازې دا چې د سولې له مشورتي لویې جرګې سره موافق نه دي، بلکې مشورتي لویې جرګې ته هم د شک په سترګه ګوري.
تازه ډاکټر عبدالله عبدالله او ټاکنیز ټیم یې د سولې مشورتي لویه جرګه تحریم کړې ده او په هغه کې یې خپل او د خپل ټیم د غړو ګوندونو ګډون رد کړی دی. د ډاکټر عبدالله عبدالله ټاکنیز ټیم ویلي، چې د افغانستان اوسني وضعیت ته په کتو، د سولې مشورتي لویه جرګه ګټوره او اغېزناکه نه ده، نو ځکه پر دغه جرګه باید وخت ضایع نه شي. د عبدالله په خبره، جرګه ډېرې ستونزې لري، خو حکومت له سیاسي ګوندونو او ټاکنیزو ټیمونو سره په دې اړه کافي او د اړتیا وړ سلا مشورې نه دي کړې.
بلخوا رسنۍ وايي چې د ملي یووالي حکومت مشران د مشورتي لویې جرګې په اړه په خپل منځ کې توافق نه لري، نو څنګه به وکړی شي چې دغه جرګه په هېواد کې د روانو ستونزو د حل او سولې په اړه بریالۍ پرېکړه وکړي. د اجرایه رییس ډاکټر عبدالله عبدالله په مشرۍ د ثبات او همپالنې ټیم د یکشنبې په ورځ د یوې اعلامیې په خپرولو سره دا هم ویلي، چې جرګه ډېرې ستونزې لري او په اړه یې له ډېرو سیاسي ګوندونو سره ډېرو مشورو ته اړتیا وه. د ډاکټر عبدالله د ټاکنیز ټیم په اعلامیه کې راغلي: ((موږ د ثبات او همپالنې ټيم، نه په دې ټیم کې د شاملو احزابو او سیاسي شخصیتونو او نه د حکومت په کچه، تر دې دمه د دې ناستې اړوند د مشورې طرف نه و او په عین حال کې د دې ناستې اړوند قانع کوونکي دلایل هم نه لرو، نو د ډاکټر عبدالله په مشرۍ د ثبات او همپالنې ټیم د سولې مشورتي جرګې تر عنوان لاندې ناسته کې ګډون نه کوي)).
د مشورتي لویې جرګې په اړه داسې اندېښنې موجودې دي، چې ښايي ولسمشر غني ترې د خپل واک د مودې غځولو په برخه کې ګټه واخلي. د اجرایه رییس په مشرۍ ټاکنیزې ډلې له پرېکون سره هممهاله داسې رپوټونه دي، چې ښايي په نږدې ورځو کې یوه ستره برخه سیاسي مشران او احزاب هم له مشورتي لویې جرګې سره خپله مقاطعه اعلان کړي.
بلخوا د حزب اسلامي مشر ګلبدین حکمتیار هم د دې جرګې په اړه خپل نظر څرګند کړی دی. نوموړي ویلي چې حکومت هڅه کوي، څو د سولې په برخه کې په ډېری مواردو کې د خپل فکر او خپلې ډلې کسان ځای پر ځای کړي. حکمتیار وایي، حکومت د سولې په ټولو غونډو او شوراګانو کې حکومتي کسان ځای پر ځای کړي، په داسې حال کې چې سوله یوه ملي مسئله ده او په هغه کې د بې طرفه او رښتینو خلکو حضور ته اړتیا ده. ګلبدین حکمتیار خبرداری ورکړی چې که حکومت د سولې په برخه کې د جوړېدونکو کنفرانسونو او جرګو بې طرفۍ ته درناوی ونه کړي او یا پکې د خپلو کسانو د ځای پر ځای کولو هڅه وکړي، نو د هېواد روان وضعیت به نور هم ترینګلی شي. هغه حکومت د سولې د ډېری هڅو پر انحصار هم تورن کړی دی.
