ترکیې له افغان سولې سره د همکارۍ او ملاتړ ژمنه کړې ده

ترکي او امریکايي ديپلوماتانو پر افغان سوله خبرې کړې دي. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په یوه ټوېټ کې ویلي، چې د ترکیې د ولسمشر له یوه سلاکار سره یې کتلي دي. ترکي چارواکي په دغه لیدنه کې ویلي، چې ترکیه د افغانستان د سولې له پروسې او په دې برخه کې د روانو ټولو هڅو ملاتړ کوي. دده په خبره ترکیه تر خپلې وسې په دغه پروسه کې همکارۍ ته تیاره ده. خلیلزاد همدا راز هغه راپورونه هم رد کړي چې ګواکي دی په قطر کې دی او له طالبانو سره خبرې کوي. دده په خبره دی لا تر اوسه په واشنګټن کې دی او قطر ته نه دی تللی. تېره ورځ ګڼو رسنیو راپورونه خپاره کړي وو، چې په قطر کې د طالبانو او امریکا ترمنځ د مخامخ خبرو بل پړاو پیل شوی دی. ټاکل شوې چې په روانه اپرېل میاشت کې به د طالبانو او امریکا ترمنځ بل پړاو مذاکرات پیل شي او تېر مذاکرات به ادامه پیدا کړي.