ښايي ولسي جرګې ته بریالي شوي نوماندان هم مشورتي لویه جرګه تحریم کړي. په دې وروستیو ورځو کې ډېرو سیاسي ډلو او ولسمشریزو ټاکنو ته نوماند کسانو او ټاکنیزو ټیمونو د سولې په اړه جوړېدونکې مشورتي ناسته تحریم کړې ده. تازه ولسي جرګې ته نویو بریالیو نوماندانو هم خبرداری ورکړی، که حکومت د ولسي جرګې پایلې ژر اعلان نه کړي، ښایي دوی یاده جرګه تحریم کړي.
د ولسي جرګې ځینو هغو نوماندانو چې په ابتدايي او نهايي پایلو کې بریالي اعلان شوي او ځینو ته یې ټاکنیزې وثیقې هم ورکړل شوې دي، د پاتې ولایتونو د نهايي پایلو د اعلان غوښتنه کړې ده. یادو نوماندانو ویلي چې له شپږ میاشتني ځنډ سره سره، ټاکنیزو کمېسیونونو د ولسي جرګې ټاکنو وروستۍ پایلې اعلان نه کړې او که ټاکنیزو کمېسیونونو تر راتلونکو لسو ورځو د ولسي جرګې ټاکنو ټولې پایلې اعلان نه کړي، دوی به لویه مشورتي جرګه تحریم کړي.
د ولسي جرګې غړي کمال ناصر اصولي چې په وروستیو پایلو کې هم بریالی اعلان شوی ویلي، ټاکنیز کمېسیونونه دې ژر تر ژره د پاتې ولایتونو وروستۍ او لومړنۍ پایلې هم اعلان کړي. اصولي ویلي: ((ډول ډول ګنګوسې خپرېږي. موږ ته ارزښت نه لري، خو دا مو غوښتنه ده چې ژر تر ژره وروستۍ پایلې اعلان کړي)). د نوموړي په خبره، که کمېسیونونه دغه کار ونه کړي، دوی به په ولایتونو کې لاریونونه وکړي او د خلکو په پرېکړه به مشورتي لویه جرګه تحریم کړي.
بلخوا بیا ځینې یاد نوماندان پر دې باور دي، چې د افغانستان وضعیت خورا ترینګلي وضعیت کې دی. د دوی په خبره، له یوې خوا د سولې خبرې روانې دي، له بلې خوا ولسمشریزې ټاکنې ځنډول شوې دي او بلخوا په دې نږدې ورځو کې مشورتي لویه جرګه جوړېږي؛ نو په دې مهم او اساس وخت کې د پارلمان او ولسي جرګې موجودیت ته جدي اړتیا ده.
ولسي جرګې ته بریالۍ شوې نومانده شینکۍ کروخېل بیا خبرداری ورکوي، که کمېسیونونه د ولسي جرګې پایلې په وخت اعلان نه کړي، نو ښايي په هېواد کې روان وضعیت نور هم ترینګلی شي. نوموړې ویلي: ((له یوې خوا جګړه، له بلې خوا د سولې خبرې، بلخوا د حکومت د مشروعیت مسئله؛ دا ټول هغه څه دي چې په هېواد کې روان وضعیت نور هم ترینګلی کوي)).
ولسي جرګې ته یادو بریاليو اعلان شويو نوماندانو ویلي، د ولسي جرګې د پایلو د نه اعلان له امله، د نظام مقننه قوه فلج شوې چې له امله یې د نظام ډېری فعالیتونه ځنډېدلي او د نظام مشروعیت له ګواښ سره مخ دی.
یادو نوماندانو ویلي چې افغانستان دا مهال په یوه حساس پړاو کې دی او ټاکنیز کمېسیونونه باید ژر تر ژره د ولسي جرګې بشپړې پایلې اعلان کړي.
په ورته وخت کې د ټاکنو خپلواک کمېسیون بیا ویلي، چې د ولسي جرګې پر پاتو پایلو د ټاکنیزو شکایتونو کمېسیون له لوري کار روان دی او په نږدې ورځو کې به د ولسي جرګې د ټولو ولایتونو نهايي پایلې اعلان شي. د دغه کمېسیون مرستیال ویاند ذبیح الله سادات ویلي، د ټاکنیزو شکایتونو کمېسیون به ډېرې ژر وروستۍ پایلې ورسره شریکې کړي او دوی به هم تر هغه وروسته پایلې اعلان کړي.
د ټاکنو خپلواک کمېسیون د معلوماتو له مخې، تر دې مهاله د کندوز، بغلان، کابل، پکتیا او کندهار ولایتونو پایلې نه دي اعلان شوې او د غزني د ولسي جرګې ټاکنو برخلیک لا تر اوسه مبهم حالت کې دی.
