ددوحې کنفرانس جوړوونکي: اصلي هدف دا دی، چې د شخړې حل ته سیاسي اجماع جوړه شي

په قطر کې د کنفرانس جوړوونکی بنسټ وايي د دوحې غونډې ګډونوال د ټولو افغانانو استازیتوب کوي او اصلي هدف دا دی چې د شخړې د حل لپاره سیاسي اجماع رامنځته شي. د قطر د شخړې او بشري څېړنو د مرکز مشر چې د غونډې کوربه دی په تازه څرګندونو کې ویلي، د غونډې د ګډونوالو شمېر به شاوخوا درې سوه تنه وي چې د خپل هېواد د راتلونکي په اړه به بحثونه او خبرې وکړي. د یاد مرکز مشر سلطان برکات وايي، په پلازمېنه دوحه کې د افغان سولې د ګډونوالو نوملړ په دقت چمتو شوی او هدف دا دی چې په دې غونډه کې د ټولو افغانانو استازي برخه واخلي. دغه مرکز پر خپل ټوېټر هم ویلي د دې غونډې هدف دا دی چې د افغانستان د شخړې د سیاسي حل لپاره د سیاسي اجماع رامنځته کولو ملاتړ وشي، داسې اجماع چې جګړه پای ته ورسوي او تلپاتې سوله رامنځته کړي. برکات وايي په دې غونډه کې دولتي چارواکي، سیاستوال، د مدني ټولنې استازي، ځوانان مذهبي مشران او په دوحه کې د طالبانو د سیاسي دفتر غړي ګډون کوي خو دی وايي ټول ګډونوال د اشخاصو په توګه دغې غونډې ته راځي.