په سختو امنیتي تدابیرو کې؛ نن په کابل کې د سولې مشورتي لویه جرګه جوړېږي

ټاکل شوې چې نن په کابل کې د سولې مشورتي لویه جرګه جوړه شي. ددغه جرګې د دایرېدو کمیسیون وايي چې د جرګې د جوړولو ټولې تیارۍ نیول شوې دي او دغه جرګه به نن دوشنبه د لویې جرګې په خیمه کې پرانیستل شي. په دغه جرګه کې د هېواد له ګوټ ګوټ ۲۸۵۰ کسانو ګډون کړی دی او دوی به د سولې په اړه حکومت ته مشورې ورکوي او سرې کرښې به ورته ټاکي. ددغه جرګې د دایرولو د کمیسیون مرستیال نجیب امین وايي چې د جرګې ۳۰ سلنه ګډونکوونکې ښځينه دي. دده په خبره د ۲۸۵۰ کسانو له ډلې ۶۹۸ یې ښځې دي، چې ۵۳۰ یې له ولایتونو او پاتې له مرکز کابل په جرګه کې ګډون کوي. په دغه کسانو کې د هېواد د ټولو برخو خلکو ګډون کړی دی او د بېلو طبقو استازي پکې حاضر دي. حکومتي ځواکونو ددغه جرګې د دايرېدو لپاره سخت امنیتي تدابیر نیولي دي. نن د کابل ښار جرګې ته نږدې سیمو کې د موټرونو تګ راتګ بند شوی دی او امنیتي تدابیر سخت شوي دي. بل پلو د پخواني ولسمشر په ګډون د ولسمشریزو ټاکنو ۱۲ نوماندانو له دغه جرګې سره پرېکون کړی او هغه یې بې ګټې بللې ده. خو د سولې مشورتې جرګې جوړوونکی کمیسیون وایي چې ددوی ګډون او نه ګډون د جرګې پر روحیه منفي اغېز نه شي کولی.