ناټو: سوله سخته پروسه ده باید په نرمښت مخته یوړل شي

په کابل کې د ناټو ملکي استازي ویلي چې د افغانستان د ښه راتلونکې لپاره ټاکنې او سوله دواړه باید په لومړیتوب کې وي. نیکولاس کې وایي، د قطر په پلازمېنه دوحه کې د افغان حکومت، سياستوالو او طالب استازو ترمنځ د کېدونکي بين الافغاني ناستې پر لغوه کېدو نا هیلی دی او هیله یې ښودلې چې هر څومره ژر باید د افغانانو ترمنځ دا ډول ناسته وشي. کې وايي، سوله يوه سخته پروسه ده چې په ډېر احتياط او حوصلې سره بايد پر مخ بوتلل شي او هر څوک بايد په دې برخه کې نرمښت وښيي. هغه د ولسمشريزو ټاکنو په اړه ویلي، د ټاکنو کمېسيون ته په کار دي چې تر ټاکنو مخکې د ولسي جرګې د تېرو ټاکنو ستونزې او نيمګړتياوې هوارې کړي. د هغه په وينا، د دغو ستونزو او نيمګړتياوو د هواري په صورت کې رڼې، باوري او ټولو ته د منلو وړ ټاکنې ممکنې دي. نیکولاس کې دغه راز زیاته کړې چې دا سازمان له افغان سولې بشپړ ملاتړ ته ژمن دی.