ملګرو ملتو او ناټو د مشورتي جرګې له پرېکړو ملاتړ کړی

ملګرو ملتونو او ناټو د سولې لپاره د مشورتي لويې جرګې له پرېکړو ملاتړ کړی دی. په افغانستان کې د ملګرو ملتونو ماموریت یا یوناما د افغان دولت او طالبانو ترمنځ د اوربند په اړه د سولې د مشورتي لویې جرګې د غوښتنې ملاتړ کړی دی. ملګرو ملتونو په یوې اعلامیه کې ویلي دي چې د مشورتي لويې جرګې له خوا غوښتل شوی اوربند به په افغانستان کې د سولې لپاره د زمینې په برابرولو کې مرسته وکړي او د افغانانو ژوند به وژغوري. د یوناما په اعلامیه کې راغلي دي چې ملګري ملتونه چمتو دي چې د افغانستان د جګړې د پای ته رسېدو په هدف له ټولو ښکېلو خواو سره لازمه مرسته او همکاري وکړي. یوناما په بریالیتوب سره د مشورتي لويې جرګې د پای ته رسېدو له امله د دې جرګې ګډونوالو ته مبارکي ویلې ده. ناټو تړون هم په کابل کې د جوړې شوې مشورتي لويې جرګې د پرېکړو او غوښتنو ملاتړ کړی دی. د افغانستان لپاره د ناټو تړون ملکي استازي نیکولاس کې پر خپله ټوېټرپاڼه لیکلي دي چې دې جرګې یو لوی پیغام ورکړ او اوس د سولې وخت دی او طالبان باید د افغانستان د خلکو غوښتنو ته درناوی وکړي.