قطر کې له يو ورځيني ځنډ وروسته نن بيا خبرې پيليږي

د افغان سولې لپاره د امریکا ځانګړی استازی زلمی خلیلزاد او طالب پلاوی په قطر کې بیا خبرې پیلوي. د طالبانو د قطر ویاند سهیل شاهین ویلي، چې د جمعې ورځې له دمې وروسته دواړو لوري نن بیا خبرې پیلوي. خلیلزاد او طالب مشرانو د تېرې چهارشنبې په ورځ د خبرو شپږم پړاو پیل کړی. خلیلزاد د طالبانو له مرستیال مشر ملا عبد الغني بردار سره لیدلي او په خپل وروستي ټوېټ کې يې ویلي چې اوس وخت را رسېدلی چې طالبان وسله کېږدي او سولې ته مخه کړي. خو طالبانو نه یوازې د خلیلزاد غوښتنه رد کړې، بلکې په یوه تازه اعلامیه کې يې د ولسمشر محمد اشرف غني له خوا د سولې او اوربند غوښتنې ته هم د نه ځواب ویلی دی.