منظور پښتین:  پاکستان په ازادانه او حساب شوې توګه افغانستان ته ترهګر لېږي

د پښتون ژغورنې غورځنګ مشر منظور پښتین په خپله تازه مرکه کې ویلي، ترهګر د پاکستاني حکومت دوستان دي او دواړه نږدې اړیکې سره پالي. نوموړي د یوې پوښتنې په ځواب کې ویلي، چې لر او بر یو افغان او یو قوم دی نو ددغه قوم بېلول د چا په وس نه دي پوره. هغه همدا راز ویلي چې پاکستان لا هم ترهګر ځپلي نه دي بلکې له ځان سره یې یو ځای کړي دي او د یوه منظم سیستم له مخې افغانستان ته لېږل کېږي. دده په خبره په جنوبي وزیرستان کې د پاکستاني پوځ پوستي هغه ترهګر ثبتوي او حسابوي چې افغانستان ته اوړي او هلته جګړه کوي. نوموړي پر پاکستاني حکومت یو ځل بیا غږ کړی چې له تاوتریخوالي، ترهګرو د ملاتړ او پښتون قوم له ځپلو لاس واخلي او نړیوالو بشري قوانینو ته درناوی وکړي. هغه همدا راز ټینګار کړی چې پاکستانی حکومت دې د پښتون قوم د ځپلو په موخه شته ترهګري نه پالي او دغه لړۍ ته دې د پای ټکی کېږدي.