سرچینه: هڅه کېږي د قطر دا ځل ناسته ښکاره پایله ولري

د قطر دفتر خبرې لا هم دوام لري. د راپورونو له مخې د طالب او امریکايي استازو ترمنځ لانجه هواره شوې ده او تمه ده چې په روانو مذاکراتو کې د پام وړ پرمختګ وشي. بي بي سي ته سرچینو ویلي چې د امریکا او طالبانو ترمنځ روانو خبرو کې پرمختګ شوی او دواړو لورو نرمښت ښودلی دی. په دې خبرو کې د تاوتریخوالي پر کمولو، بین الافغاني خبرو، د سرتېرو په ایستلو او ځینو نورو مواردو بحث کېږي. سرچینې ویلي هڅه کېږي دا ځل خبرې یوه ښکاره او ګټوره پایله ولري. له همدې امله به دغه مذاکرات د روژې په میاشت کې هم دوام وکړي. په دوحه کې د قطر په کوربه توب د طالبانو او امریکا ترمنځ شپږم پړاو مذاکرات روان دي. په دې مذاکراتو کې یوه ورځ ځنډ او ځینې ستونزې رامنځ ته شوې وې چې اوس حل شوې دي.