ولسمشر غني: طالبان دې روژې ته په درناوي، د جګړې پر ځای سوله وکړي

ولسمشر غني یو ځل بیا پر طالبانو غږ وکړ چې له جګړو لاس واخلي او د سولې له پروسې سره یو ځای شي. ولسمشر غني د روژې په مناسبت په خپاره کړي ویډیويي پیغام کې له وسله والو طالبانو وغوښتل چې دغه میاشتې ته درناوی وکړي او د افغانانو د سولې غوښتنې غږ ته غوږ کېږدي. دده په وینا روژه د برکتونو او سولې میاشت ده نو طالبانو ته هم په کار ده، چې دغه مبارکې میاشتې ته احترام وکړي او په خپل هېواد کې له روانو جګړو لاس واخلي. ولسمشر غني زیاته کړې، افغانانو په مشورتي لویه جرګه کې دا وښوده، چې دوی د سولې غوښتونکي دي او په یوه خوله یې له طالبانو د سولې او مذاکراتو د پيلولو غوښتنه کړې، نو دوی ته هم په کار ده، چې د افغانانو دغه غوښتنې ته د هو ځواب ورکړي. هغه د جوماتونو له ملا امامانو او دیني علماوو هم غوښتي چې په دې مبارکه میاشت کې دې خلکو ته د سولې، ورورولۍ او یووالي په اړه خبرې او ویناوې وکړي.