سیمه ییز چارواکي: طالبانو سرپل کې تر ابتدایې پورته د نجونو ښوونځي تړلي

د سرپل چارواکي وایي، د سږ کال له پیل راهیسي سلګونه هغه نجونې ښوونځیو ته له تګه ګرځول شوې چې له لومړنۍ دورې یا شپږم ټولګي پورته زده کړې کوي. د چارواکو په خبره، د طالبانو له دې بندیز سره نږدې ۳۰ ښوونځي تړل شوي دي. د یاد ولایت د پوهنې چارواکي وایي، ځینو محدودو سیمو کې طالبانو د سپین ږېرو په منځګړتوب تر نهم ټولګي پورې د نجونو زده کړو ته اجازه ورکړې ده. د دوی په خبره، دا ستونزه تر ډېره په هغو سیمو کې رامنځته شوې چې د طالبانو تر واک لاندې دي. خو د طالبانو ویاند قاري یوسف احمدي وایي، دوی د نجونو له زده کړو سره ستونزه نه لري او دا د دوی د بدنامولو تبلیغ دی.