هندي او امریکايي چارواکو پر افغان سولې خبرې کړې دي

د راپورونو له مخې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد تېره ورځ ناوخته د هند د بهرنیو چارو له وزیرې سره کتلي دي. خلیلزاد په دې لیدنه کې له طالبانو سره د خبرو وروستي جزیات له سوشما سوارج سره شریک کړي دي. دواړو لورو په دې لیدنه کې ټینګار کړی چې افغانستان ته یوازې له سیاسي لارو او روانو مذاکراتو سوله راتللی شي او دلته باید روانه جګړه ختمه کړل شي. سوشما سوارج ویلي، چې هېواد یې په افغان سوله کې همکارۍ ته تیار دی او په همدې تړاو به ډېر ژر په سیمه کې له کلیدي اړخونو سره بحثونه ولري. نوموړې ډاډ ورکړی چې دوی به د افغانستان په پرمختګ او امنیت کې خپلو هڅو ته ادامه ورکوي.