زلمی خلیلزاد:  افغانان دې روژې ته په درناوي د جګړې پر ځای سوله وکړي

د افغان سولې لپاره د امریکا ځانګړي استازي زلمي خلیلزاد ټولو افغانانو ته د روژې د را رسېدو له امله مبارکي ویلې ده. نوموړي ویلي هیله لري چې د روژې په برکت افغانان له اوږدې او خونړۍ جګړې را ووځي. دده په خبره اوس ددې وخت دی چې افغانان سره کېني او ستونزې د خبرو له لارې حل کړي. زلمي خلیلزاد همدا راز ویلي چې افغانان دې د روژې په درناوي له جګړو لاس واخلي او له یو بل سره دې د مخامخ خبرو پر مټ شته ستونزې حل کړي. زلمی خلیلزاد تېره ورځ هند ته تللی و او ښایي نن بېرته په دوحه کې له طالبانو سره مخامخ خبرې پيل کړي.