له ترکیې څخه ایستل شوي افغانان؛ که حکومت زموږ لګښت را نه کړي کورونو ته به ستانه نشو

له ترکیې هېواد څخه په جبر ایستل شوي نږدې ۲۵۰ افغان ځوانان چې په هېواد کې د ناامنۍ او وزګارتیا له امله ترکیې ته د تګ په موخه یې خپل هېواد پرېښی و، د ترکیې له لوري را ایستل شوي او له شپږو میاشتو وروسته پرون کابل ته راوستل شول. یاد ایستل شوي ځوانانو، افغان چارواکي په بې پروايي تورن کړل. دوی وايي، چې پاکستاني او ایراني کډوال و نه ایستل شول؛ خو هغوی یې په زور واېستل. دوی وايي تر هغه به خپل اعتراض ته دوام ورکوي څو چې حکومت د کارموندنې او د لګښت ورکړې په برخه کې خپلې ژمنې نه وي پوره کړي. اعتراض کوونکي وايي چې د ژوند ټول شته امکانات یې د دې کډوالۍ پرمهال له لاسه ورکړي دي او اوس هیڅ هم نه لري او ان کورنۍ یې هم نه قبلوي؛ څو چې حکومت هغوی په کار نه کړي او په یاد سفر کې یې چې کوم لګښتونه کړي ور نه کړي، خپلو ولایتونو ته به ستانه نه شي