په افغانستان کې د امریکا اوږدې جګړې نه یوازې افغانان، بلکې عام امریکایان هم ستړي کړي دي. له کلونو راهیسې په امریکا کې د جګړې ضد خوځښتونه او مدني فعالان په افغانستان کې د خپل هېواد د نظامي حضور پای غواړي، خو په دې وروستیو کې دغه ډول غوښتنې او حرکتونه ډېر شوي دي. ډېرې امریکايي رسنۍ په دې اړه لیکنې کوي او ډېر امریکایي فعالین او لیکوالان په افغانستان کې د امریکا جګړه بې ګټې او خونړۍ بولي.
امریکايي وګړي پر دې باور دي چې په افغانستان کې یې د پوځیانو جګړه بې هدفه روانه ده او دوی بریالي شوي نه دي، چې هلته ترهګري ماته او ولسواک نظام حاکم کړي. له همدې امله یې په ځلونو له حکومت څخه غوښتي، چې دغه جګړه پای ته ورسوي. تازه یوه امریکايي میلیاردر د دې جګړې د پای ته رسولو لپاره پر تبلیغاتو پیل کړی دی او ویل کېږي چې میلیونونه ډالر به ورباندې ولګوي.
د افغان جګړې د دوام په اړه امریکايي وګړو د غبرګونونو په دوام، تازه د سي ان ان د یوه خبر له مخې، د امریکا د متقاعدو عسکرو ستره ډله له ولسمشر ټرمپ غواړي چې د افغانستان او سوریې په اړه پر خپلو کړو ژمنو وفا وکړي او امریکايي عسکر له دغو هېوادونو راوباسي. دا متقاعد عسکر چې د امریکا د میلیاردر کوک له خوا تمویلېږي، وايي چي ټرمپ وعده کړې وه، چې ستر ملتونه په ابدي جنګونو کې ځان نه بندوي.
ویل کېږي چې دغه ډله به د ټولنیزو رسنیو ترڅنګ، په انځوریزو او غږیزو رسنیو کې پراخ تبلیغات کوي او د ټرمپ له حکومت څخه به غواړي چې ژر تر ژره پر خپلو ژمنو عمل وکړي او دلته د روانې جګړې د پای ته رسولو لپاره عملي اقدامات پيل کړي. د دغه کمپاین تنظیموونکي هم وایي چې په کانګرېس کې به هم د خپلې غوښتنې لپاره لابي وکړي او د امریکا په ګوټ ګوټ کې به سترې غونډې او جلسې جوړې کړي.
د دې تر څنګ، څو ورځې وړاندې په امریکا کې هغو سرتېرو یوه غونډه جوړه کړې وه، چې تازه له افغانستان څخه ستانه شوي وو. دوی له امریکايي حکومت څخه وغوښتل، چې په افغانستان کې روانه جګړه پای ته ورسوي او د امریکایي وګړو غږ واوري. بل پلو نیویارک ټایمز مجلې بیا په تازه څرګندونو کې ویلي، چې پنټاګون له یوه کال راهیسې امریکایي وګړو ته د افغانستان د جګړې په اړه معلومات نه دي ورکړي.
د نیویارک ټایمز ورځپاڼې په مطلب کې په افغانستان کې د جګړې په تړاو، د امریکا د حکومت پر کړنو نیوکه شوې او په دې اړه یې لیکلي چې د امریکا حکومت ته پکار دي، چې د افغان جګړې په اړه له امریکايي ولس سره رښتینولي وکړي. لیکوال وايي، نږدې له یو کال راهیسې د امریکا دفاع وزارت د افغانستان په اړه ولس ته څه نه دي ویلي. د لیکوال په باور، که امریکا په افغانستان کې د بریا تمه نه لري، نو دا په دې معنی نه ده چې د حساب کتاب بهیر دې ودرول شي.
بل پلو په افغانستان کې تازه د ملکي وګړو د خوندیتوب او عدالتغوښتنې ډلې تر څنګ، ډېرو مدني خوځښتونو روانه جګړه د عامو افغانانو په زیان بللې ده. دوی پر امریکا، افغان حکومت او طالبانو غږ کړی، چې دغه جګړه پای ته ورسوي او په خپلو کې ستونزې د خبرو له لارې حل کړي. د یادو ډلو په خبره، په جګړه کې تر بل هر چا عام افغانان ډېر وژل کېږي، نو باید ودرول شي او یوه اوږدمهاله اوربند ته لار هواره شي.
د مشرانو جرګې مشر فضل الهادي مسلمیار هم د دغه جرګې په وروستۍ غونډه کې ویلي وو، چې د جګړو او په تېره شپنیو عملیاتو ۹۵ سلنه قربانیان عام افغانان دي. نوموړي پر ښکېلو خواوو د جګړو د درولو او سولې غږ کړی دی. هغه همدا راز په کلکه د شپنیو عملیاتو مخالفت کړی دی او هغه یې د عامو افغانانو په زیان بللي دي.
