عبدالله عبدالله: طالبانو د اوربند غوښتنه نه ده منلې او جګړو ته ادامه ورکوي

اجرایه رییس وایي له پرله پسې غوښتنو سره سره طالبان اوربند نه کوي او جګړو ته ادامه ورکوي. ډاکټر عبدالله عبدالله نن د وزیرانو شورا په غونډه کې د خبرو پر مهال وویل، چې له وسله والو طالبانو په ځلونو د روژې په مبارکه میاشت کې د اوربند غوښتنه شوې ده، خو دغه ډلې لا هم جګړې ته ادامه ورکړې ده. هغه زیاته کړې، سره له دې چې د افغان جګړې د پای او سولې په برخه کې خبرې روانې دي، خو د طالبانو پر جګړو یې هېڅ راز اغېز نه دی کړی او دوی د سولې لپاره کوم نرمښت نه دی ښودلی. عبدالله وایي له دې ښکاري چې طالبان جګړې ته ادامه ورکوي او د سولې مذاکرات یې پر موخو کوم اغېز نه کوي. هغه هیله څرګنده کړې چې طالبان د عامو افغانانو د سولې غږ واوري او نور له جګړو لاس واخلي.