د ولسمشرۍ نوماندان: د جوزا تر لومړۍ نیټې وروسته باید سرپرست حکومت جوړ شي

د راتلونکو ولسمشرۍ ټاکنو د نوماندانو شورا د جوزا له لومړۍ نیټې وروسته د سرپرست حکومت پر رامنځته کېدو ټینګار کړی دی. یادې شورا چې د راتلونکو ټاکنو د ۱۸ نوماندانو له ډلې ۱۱ پکې شامل دي تېره ورځ یې حکومت ته دوه وړاندیزونه هم وړاندې کړي دي. د دوی په طرحه کې راغلي چې ولسمشر په هغه صورت کې کولی شي سرپرست پاتې شي چې له نوماندۍ تېر شي. د دغه کاندیدانو په دوهم وړاندیز کې راغلي، ولسمشریزو ټاکنو ته د ولاړو کاندیدانو له ډلې او د سیاسي احزابو لخوا پر شرایطو برابر کسان هم کولی شي د سرپرست حکومت بست ته ځان کاندید کړي. یادې شورا خبرداری ورکړی که چېرې د ملي یووالي حکومت مشران وغواړي د جوزا میاشتې له لومړۍ نیټې وروسته هم خپل کار ته دوام ورکړي، د دغه غیر قانوني کار بدې پایلې به د هغوی پر غاړه وي.