په افغانستان کې د داعش ډلې د فعالیتونو ډېرېدو اندېښنې را ولاړې کړې دي. سره له دې چې امریکا له طالبانو سره په قطر کې د سولې خبرې مهم پړاو ته رسولې دي، خو د هېواد په ختیځ، شمال او ځینو نورو ولایتونو کې د داعش ډلې حضور او فعالیتونه د اندېښنې وړ دي. په دې وروستیو کې ډېرو نړیوالو او سیمه ییزو رسنیو راپورونه خپاره کړي، چې د داعش حضور د هېواد په ختیځ په تېره په کونړ او ننګرهار کې پراخ شوی دی او عملي جګړې یې پيل کړې دي.
راپورونه وایي چې امریکا له طالبانو سره په قطر کې خبرې کوي، خو په شمال ختیځو ولایتونو، جنوب او شمال کې د داعش ډلې جلب او جذب زور اخیستی دی. بل پلو وسله وال طالبان هم د دغه ډلې له فعالیتونو او راپورته کېدو اندېښنه لري او ویل کېږي چې د سولې په برخه کې یو خنډ هم د دغه ډلې حضور دی. وسله والو طالبانو ته نږدې سرچینې وایي، طالبان دا وېره لري چې ښايي د دوی له سولې وروسته، داعش ډله تر دیني شعار لاندې فعالیتونو او جګړې ته ادامه ورکړي او په دې توګه به په هېواد کې د جګړې یو بل پړاو پيل کړي.
وسله والو طالبانو ته نږدې کسان بیا پر دې باور دي، چې امریکا غواړي طالبان په یوه سړه جګړه کې ښکېل وساتي. د دوی په خبره، له طالبانو سره اوسنی رامنځ ته شوی وضعیت چې نه سوله ده او نه جګړه، پخپله داعش ته د فعالیت زمینه برابرول دي. پخواني طالب چارواکي سید اکبر اغا ویلي، امریکا هڅه کوي چې طالبان په سړه جګړه کې ښکېل وساتي او په دې توګه د داعش په فعاليدو سره خپل حضور ته زمینه برابره کړي. سیداکبر اغا ویلي: ((اوس نه سوله کېږي نه جګړه ده، دا مسئله طالبان په یوه سړه جګړه کې ښکېلوي، چې د افغانستان په ګټه نه ده. دا به داعش ډلې ته د فعالیت زمینه برابره کړي او دغه ډله به پیاوړې کړي)).
په ختیځ کې ځايي اوسېدونکي او سیمه ییزې رسنۍ وایي، چې د کونړ ولایت ډېره برخه داعش ډلې نیولې ده او هره ورځ د کسانو په جلب او جذب لګیا دي. د دوی په خبره، دغه ډله په ښار کې غلچکي بریدونه کوي، دیني علما په نښه کوي او په دې هڅه کې ده چې د خپل فعالیت لمن پراخه کړي.
تر دې وړاندې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم ویلي وو، چې ښايي له طالبانو سره تر سولې وروسته افغانستان کې جګړه ختمه نه شي. د نوموړي دغه خبرې هم د افغان سیاستوالو ترمنځ ډول ډول غبرګونونه پارولي وو. وسله وال طالبان هم له دې اړخه وېره لري، چې ښایي تر سولې وروسته داعش ډلې ته د فعالیت زمینه برابره شي او د وسله والو طالبانو ځای دغه ډله ونیسي. قطر دفتر ته نږدې سرچینې وایي چې د زلمي خلیلزاد او طالبانو ترمنځ په وروستي پړاو خبرو کې د بحث مهم ټکی د داعش ختمول او له دغه ډلې سره د مبارزې پر څرنګوالي خبرې وې. طالبان ټینګار کوي چې تر سولې مخکې یا هم په دې لړ کې دې دغه ډله وځپل شي او د فعالیت اجازه دې نه ورکول کېږي.
بل پلو ځینې بهرنۍ رسنۍ راپور ورکوي چې په عراق او سوریه کې د داعش تر ماتې وروسته، دې ډلې افغانستان، افریقا او ځینو نورو سیمو ته مخه کړې ده. تازه برېټانوۍ سن ورځپاڼې ویلي چې ښایي د داعش یا اسلامي دولت نومې ډلې مشر ابوبکر البغدادي د افغانستان په کوم ختیځ ولایت کې پټ شوی وي. د ورځپاڼې په خبره، د داعش ډلې د مشر نوې ویډیو ښيي چې هغه افغانستان ته رسېدلی دی او هلته په کوم ختیځ ولایت کې پټ شوی دی.
په ورته وخت کې افغان حکومت بیا وایي چې دوی د داعش ډلې پر وړاندې مبارزه کوي او دې ډلې ته به اجازه ور نه کړي، چې خپل فعالیتونه پراخ کړي. د روسیې په ګډون، د منځنۍ اسیا ځینې هېوادونه هم په افغانستان کې د داعش ډلې د فعالیتونو په اړه اندېښمن دي.
