سره له دې چې د غبرګولي لومړۍ نېټې ته د ګوتو په شمېر ورځې پاتې دي، خو ولسمشریزو ټاکنو ته نوماندان وايي چې تر یادې نېټې وروسته د ولسمشر غني د کار دوام د قانون خلاف دی. د ولسمشریزو ټاکنو ۱۲نوماندانو چې د ولسمشریزو ټاکنو د نوماندانو شورا یې جوړه کړې، ويي چې تر نوي ولسمشر پورې باید یو موقت ولسمشر حکومت اداره کړي. دغه شورا پرون په یوه خبري غونډه کې یوه طرحه وړاندې کړې چې له مخې یې باید یو بل کس په موقته توګه اوسنی سیاسي نظام اداره کړي.
د ولسمشرۍ نوماندانو شورا پرون په خپله خبري غونډه کې له ولسمشر محمد اشرف غني دا هم وغوښتل چې د جوزا (غبرګولي) په لومړۍ نېټه واک پرېږدي او د هېواد چارې یوه سرپرست ولسمشر ته وسپاري. د ولسمشرۍ ۱۲ نوماندان چې د یوې شورا په چتر کې سره راټول شوي وایي، که محمد اشرف غني غواړي د غبرګولي له لومړۍ نېټې وروسته هم د دولت سرپرست پاته شي، نو باید د راتلونکو ټاکنو له نوماندۍ لاس په سر شي.
نوماندان وایي، د ولسمشر د کار دوام د غبرګولي تر لومړۍ وروسته د قانون خلاف دی او په خبره یې که ولسمشر د اساسي قانون خلاف خپل کار ته دوام ورکړي، دوی به د یوې اجماع له مخې د دولت د سرپرست د ټاکلو تکل وکړي. دوی وایي، له ګوندونو، نوماندانو، علماوو او ملي شورا، د اساسي قانون پر تطبیق د څار او بشري حقونو کمېسیونونو، مدني ټولنو، ښځو او حقوقپوهانو له شبکو یوه جوړه شوې اجماع به د دولت د سرپرست ټاکلو ته مټې راونغاړي.
د اساسي قانون پر بنسټ، د ولسمشر دنده د پنځم کال د غبرګولي یا جوزا په لومړۍ نېټه، تر ولسمشریزو ټاکنو وروسته پای ته رسېږي. د افغانستان اساسي قانون همدا راز وایي، ولسمشریزې ټاکنې باید د ولسمشر د دندې تر پای ته رسېدو ۳۰ یا ۶۰ ورځې مخکې ترسره شوې وي، خو حکومت د ستونزو او فساد له امله بریالی نه شو چې ولسمشریزې ټاکنې پر خپل وخت ترسره کړي، له دې امله سترې محکمې د ولسمشر غني د کار دوام د راتلونکي ولسمشر تر راتګ پورې غځولی دی.
د ولسمشریزو ټاکنو نوماندان بیا وایي چې سترې محکمې د قانون خلاف کار کړی او ولسمشر غني ته نه ده په کار چې د کار په دوام سره یې په هېواد کې نوو ستونزو ته لمن ووهي. د ولسمشریزو ټاکنو نوماندان او د نوماندانو د شورا غړي، حنیف اتمر وویل، چې که ولسمشر په غیر قانوني توګه خپلې دندې ته ادامه ورکوي، نو په هېواد کې به نوې ستونزې را ولاړې کړي.
بل پلو ارګ بیا د نوماندانو پر دغه کار څرګندونو غبرګون ښودلی دی. د ولسمشر یوه ویاند شاه حسین مرتضوي نوماندانو ته د اساسي قانون د لوستلو سپارښتنه کړې ده. بل ویاند یې هارون چخانسوري بیا ویلي چې د اساسي قانون تفسیر د سترې محکمې صلاحیت دی او د افغانستان سترې محکمې د هېواد حالاتو او وضعیت ته په کتو دا پرېکړه کړې چې ولسمشر غني به د نوي ولسمشر تر راتګ پورې خپلې دندې ته ادامه ورکوي. د چخانسوري په خبره، د سرپرست ولسمشر ټاکل او یا دې ته ورته د کوم جوړښت رامنځته کول د اساسي قانون خلاف عمل دی او په خبره یې هر څوک په خپله خوښه او د خپلو ګټو لپاره اساسي قانون نه شي تفسیرولی. نوموړي د نوماندانو د شورا طرحه هم د اساسي قانون خلاف بللې ده.
درې اونۍ وړاندې سترې محکمې پرېکړه وکړه چې له مخې یې ولسمشرغني د راتلونکي ولسمشر تر ټاکل کېدو پورې په خپل ځای پاتې کېږي. د ولسمشرۍ نوماندانو پخوا هم د سترې محکمې دغه حکم غندلی وه. ټاکل شوې چې راتلونکې ولسمشریزې ټاکنې د تلې میاشتې په شپږمه نېټه ترسره شي او تر هغه به ولسمشر غني د دولت چارې اداره کوي.
