میلر: سولې ته ژمن یو خو په جګړه کې هم د افغان ځواکونو ملاتړ کوو

په افغانستان کې د ناټو د غوڅ ملاتړ ماموریت عمومي قومندان جنرال سکاټ میلر هرات ولایت ته په خپل سفر کې ویلي چې ناټو او نړیواله ټولنه د افغان سولې له پروسې بشپړ ملاتړ کوي خو اوسمهال چې جګړه روانه ده په دې جګړه کې هم افغان ځواکونه یوازې نه دي او دوی له ترهګرۍ سره د مبارزې په برخه کې د هغوی تر څنګ ولاړ دي. نوموړی له یو لوړپوړي افغان امنیتي پلاوي سره د جنوبي حوزې د امنیتي وضعیت د څېړنې په موخه هرات ولایت ته تللی دی. په ورته وخت کې افغان امنیتي چارواکي وایي چې د هېواد په بیلابیلو برخو کې یې ترهګر ځپلي دي او اوس د تېر په څېر د جګړې کولو توان نه لري. هغوی دغه راز زیاتوي چې افغان ځواکونه پیاوړي شوي دي او په دې وروستیو کې یې په مېړانه د وسله والو طالبانو د ډېریو بریدونو مخنیوی کړی دی.