په افغانستان کې د ناورین یادښتونه کتاب د یوې انګرېزې لیکوالې ورځني یادښتونه او خاطرې دي چې د افغان-انګلیس د لومړۍ جګړې پرمهال یې لیکلې دي.
په دغه یادښتونو کې نوموړې لیکوالې د افغان-انګلیس د لومړۍ جګړې په تړاو د هغه مهال ډېری مهمې چارې یادې کړې دي. په هغه جګړه کې د افغانانو سره د دوی د جګړې په لاملونو، مهمو پېښو، مبارزو او توافقاتو هر اړخیز تاریخي بحثونه شوي دي.
یاد کتاب په لومړي ځل په ۱۸۴۳ز کال کې په انګریزي ژبه لیکل او خپور شوی دی او پښتو ژبې ته ښاغلي عتیق ځاځي ژباړلی دی. دغه کتاب د ژباړن یوه مفصله سریزه او اخریزه او د لیکوالې یوه سریزه او د ورځني یادښتونو بشپړ لړ ټول کتاب په بر کې نیسي، چې په ټوله کې کتاب ۳۲۰ مخونه لري، او اکسوس کتابپلورنځي چاپ او نوی د کتاب بازار ته وړاندې کړی دی.
د یادونې وړ ده چې ښاغلي ځاځي تر دې مخکې یو بل تاریخي اثر(ستر سکندر او یونانیان د ننني افغانستان په سیمه کې) هم لیکلی و، چې د لوستونکو له تاوده هرکلي سره مخ شوی و.
د دې کتاب د خپرندوی مسوول په وینا یاد کتاب د نوموړي ژباړن او لیکوال غوره او د علاقې وړ ژباړه ده چې بډایه او کره متن لري او د افغانستان د سیاسي تاریخي او هم د لومړي یرغل د جرړو او هم د اوسنیو روانو چارو لپاره کوم چې افغانستان پېژندونکي ورته اړتیا لري، د یوې غوره سرچینې په توګه پرې استناد کولای شي.
